కల్వకుర్తిలో లంచం దందా బహిర్గతం…ఉప ఇంజనీరు ఏసీబీ కి పట్టుబాటు.

కల్వకుర్తిలో లంచం దందా బహిర్గతం…ఉప ఇంజనీరు ఏసీబీ కి పట్టుబాటు.

-ట్రాన్స్‌ఫార్మర్ పని నిమిత్తం లంచం డిమాండ్.
-రూ.15 వేలు స్వీకరిస్తూ రెడ్‌హ్యాండెడ్‌గా అరెస్ట్.
-ఫిర్యాదుదారుల వివరాలు గోప్యమని ఏసీబీ హామీ.

జనం వాయిస్,నాగర్‌కర్నూల్, డిసెంబర్ 09 :

కల్వకుర్తి ఉపవిభాగానికి చెందిన విద్యుత్‌ శాఖ ఉప ఇంజనీరు యెద్దుల వెంకటేశ్వర్లు లంచం స్వీకరిస్తూ అవినీతి నిరోధక శాఖ అధికారులకు చిక్కారు. ఫిర్యాదుదారుని ఇంటి వద్ద ట్రాన్స్‌ఫార్మర్ ఏర్పాటు ప్రక్రియను పూర్తి చేయడం, అతని పేరుతో విద్యుత్‌ మీటర్ మంజూరు చేయడం కోసం రూ.20 వేలు డిమాండ్ చేసిన ఆయన, అందులో రూ.15 వేలు తీసుకుంటున్న సమయంలో ఏసీబీ దాడి చేసి పట్టుకుంది. వెల్దండ విభాగానికి ఇన్‌చార్జిగా పనిచేస్తున్న ఈ ఉప ఇంజనీరు ప్రజాసేవ పేరుతో లంచం వసూళ్లకు పాల్పడడం ప్రాంతంలో తీవ్ర చర్చకు దారితీసింది. ఏసీబీ అధికారులు ఆధారాలతో కేసు నమోదు చేసి, నిందితుడిని అదుపులోకి తీసుకున్నారు. లంచం కోరే ఏ ప్రభుత్వ ఉద్యోగిపై అయినా వెంటనే ఫిర్యాదు చేయాలని ఏసీబీ విజ్ఞప్తి చేసింది. ఇందుకోసం టోల్‌ ఫ్రీ 1064, వాట్సాప్ 9440446106, అలాగే శాఖ అధికారిక వేదికల ద్వారా సమాచారాన్ని అందించవచ్చని తెలిపింది. ఫిర్యాదుదారుల వివరాలు పూర్తిగా రహస్యంగా ఉంచబడతాయని ఏసీబీ భరోసా ఇచ్చింది. అవినీతిని నిర్మూలించే పోరులో ప్రజల సహకారం అత్యంత ముఖ్యమని శాఖ పేర్కొంది.