ఉగ్రరూపంలో బొగత జలపాతం.

ఉగ్రరూపంలో బొగత జలపాతం.

భారీ వర్షాలతో పెరిగిన వరద ఉద్ధృతి.
పర్యాటకుల ప్రవేశంపై తాత్కాలిక నిషేధం.
అప్రమత్తంగా ఉండాలని అధికారుల హెచ్చరిక.
భద్రతా చర్యలు ముమ్మరం.

జనం వాయిస్, ములుగు, జూలై 29:

వాయవ్య బంగాళాఖాతంలో ఏర్పడిన తీవ్ర వాయుగుండం ప్రభావంతో తెలంగాణ ఉత్తర జిల్లాల్లో ఎడతెరిపి లేకుండా కురుస్తున్న భారీ వర్షాల కారణంగా ములుగు జిల్లా వాజేడు మండలంలోని ప్రసిద్ధ బొగత జలపాతం ఉగ్రరూపం దాల్చింది. ఎగువ అటవీ ప్రాంతాల నుంచి భారీగా వరద నీరు చేరడంతో జలపాతం ఉద్ధృతంగా ప్రవహిస్తోంది. గత పది గంటలుగా అటవీ ప్రాంతంలో కురుస్తున్న నిరంతర వర్షాలతో జలపాతంలో నీటి ప్రవాహం ఒక్కసారిగా పెరిగింది. భారీ వరద ప్రవాహంతో జలపాతం పరిసర ప్రాంతాలు ప్రమాదకరంగా మారడంతో పరిస్థితిని అధికారులు నిరంతరం పర్యవేక్షిస్తున్నారు.
పర్యాటకుల భద్రతను దృష్టిలో ఉంచుకుని ములుగు జిల్లా వాజేడు మండలం చీకుపల్లి వద్ద ఉన్న బొగత జలపాతం సందర్శనను అటవీ శాఖ అధికారులు తాత్కాలికంగా నిలిపివేశారు. తదుపరి ఆదేశాలు వచ్చే వరకు పర్యాటకులను అనుమతించబోమని స్పష్టం చేశారు. వరద ఉద్ధృతి కారణంగా రాళ్లు జారిపడే ప్రమాదం ఉండటంతో పాటు నీటి ప్రవాహం అకస్మాత్తుగా మరింత పెరిగే అవకాశం ఉందని అధికారులు హెచ్చరించారు. ఎవరూ జలపాతం వద్దకు వెళ్లే ప్రయత్నం చేయవద్దని, నిబంధనలు తప్పనిసరిగా పాటించాలని సూచించారు. అవాంఛనీయ ఘటనలు జరగకుండా జలపాతం పరిసర ప్రాంతాల్లో పోలీసులు, అటవీ శాఖ అధికారులు భద్రతా ఏర్పాట్లు కట్టుదిట్టం చేశారు. ప్రమాదకర ప్రాంతాల్లో హెచ్చరిక బోర్డులు ఏర్పాటు చేసి, ప్రజలను అప్రమత్తం చేస్తున్నారు. వరద ఉద్ధృతి తగ్గి పరిస్థితులు పూర్తిగా సాధారణ స్థితికి చేరుకున్న తర్వాత మాత్రమే పర్యాటకులను అనుమతించే అంశంపై నిర్ణయం తీసుకుంటామని అధికారులు తెలిపారు. అప్పటి వరకు ప్రజలు, పర్యాటకులు అధికారుల సూచనలను పాటిస్తూ సహకరించాలని విజ్ఞప్తి చేశారు.