తెలంగాణకు చల్లటి కబురు.
నేడు, రేపు పలు జిల్లాల్లో వర్షాలు.
ఉపరితల ఆవర్తన ప్రభావంతో వాతావరణ మార్పులు.
ఎల్లుండి నుంచి మళ్లీ పెరగనున్న ఎండల తీవ్రత.
జనం వాయిస్, హైదరాబాద్, మే 18:
భానుడి భగభగలతో ఉక్కిరిబిక్కిరవుతున్న తెలంగాణ ప్రజలకు వాతావరణ శాఖ కాస్త ఊరటనిచ్చే సమాచారం వెల్లడించింది. రాష్ట్రంలో ఉపరితల చక్రవాత ఆవర్తన ప్రభావంతో నేడు, రేపు తేలికపాటి నుంచి మోస్తరు వర్షాలు కురిసే అవకాశం ఉందని హైదరాబాద్ వాతావరణ కేంద్రం తెలిపింది. గత కొన్ని రోజులుగా తీవ్ర ఎండలతో ఇబ్బంది పడుతున్న ప్రజలకు ఈ వర్షాలు కొంత ఉపశమనం కలిగించే అవకాశం ఉందని అధికారులు పేర్కొన్నారు. వాతావరణ శాఖ అంచనాల ప్రకారం హైదరాబాద్తో పాటు భద్రాద్రి కొత్తగూడెం, నల్లగొండ, వికారాబాద్, మహబూబ్నగర్, కామారెడ్డి, మల్కాజిగిరి, రంగారెడ్డి, వనపర్తి, గద్వాల జిల్లాల్లో వర్షాలు కురిసే అవకాశం ఉంది. కొన్ని ప్రాంతాల్లో ఉరుములు, ఈదురుగాలులతో కూడిన వర్షాలు పడే అవకాశమున్నట్లు అధికారులు తెలిపారు.
గత కొన్ని రోజులుగా రాష్ట్రవ్యాప్తంగా ఉష్ణోగ్రతలు భారీగా నమోదవుతున్నాయి. మధ్యాహ్న సమయంలో ప్రజలు బయటకు రావడానికి కూడా ఇబ్బందులు ఎదుర్కొంటున్నారు. ఈ పరిస్థితుల్లో వర్షాలు కురవడం వల్ల ఉష్ణోగ్రతలు కొంత మేర తగ్గే అవకాశం ఉందని వాతావరణ నిపుణులు భావిస్తున్నారు. అయితే ఈ ఉపశమనం తాత్కాలికమేనని అధికారులు హెచ్చరిస్తున్నారు. ఎల్లుండి నుంచి రాష్ట్రంలో మళ్లీ ఎండల తీవ్రత పెరిగే అవకాశం ఉందని వాతావరణ శాఖ స్పష్టం చేసింది. పలు జిల్లాల్లో అధిక ఉష్ణోగ్రతలు నమోదయ్యే అవకాశం ఉండటంతో రెడ్ అలర్ట్ కూడా జారీ చేశారు. ఎండల ప్రభావం అధికంగా ఉండే అవకాశాల నేపథ్యంలో ప్రజలు అప్రమత్తంగా ఉండాలని అధికారులు సూచించారు. అత్యవసరమైతే తప్ప మధ్యాహ్న సమయంలో బయటకు వెళ్లకూడదని, బయటకు వెళ్లాల్సి వస్తే తగిన జాగ్రత్తలు తీసుకోవాలని తెలిపారు. వేసవి తీవ్రత దృష్ట్యా ఎక్కువగా నీరు తాగడం, శరీరాన్ని చల్లగా ఉంచుకోవడం, చిన్నారులు, వృద్ధులు ప్రత్యేక జాగ్రత్తలు తీసుకోవడం అవసరమని సూచించారు. రానున్న రోజుల్లో వాతావరణ పరిస్థితులపై ప్రజలు అప్రమత్తంగా ఉండాలని అధికారులు కోరారు.