హమాలీ కార్మికుల సంక్షేమానికి కాంగ్రెస్ ప్రభుత్వం అండ: మంత్రి వివేక్ వెంకటస్వామి.
- హమాలీలకు ప్రత్యేక వెల్ఫేర్ బోర్డు, ఈఎస్‌ఐ, పీఎఫ్ సదుపాయాల కల్పనకు కృషి.
- కార్మికుల కనీస వేతనాల పెంపునకు ప్రభుత్వం కట్టుబడి ఉంది.
జనం వాయిస్, పెద్దపల్లి, అక్టోబర్ 25:
హమాలీ కార్మికుల సంక్షేమానికి కాంగ్రెస్ ప్రభుత్వం అండగా ఉంటుందని రాష్ట్ర మంత్రి వివేక్ వెంకటస్వామి తెలిపారు. కార్మికులకు ప్రత్యేక వెల్ఫేర్ బోర్డు ఏర్పాటు చేయడంతో పాటు ఈఎస్‌ఐ, ప్రావిడెంట్ ఫండ్ (పీఎఫ్) వంటి సదుపాయాలు కల్పించేందుకు కృషి చేస్తానని హామీ ఇచ్చారు. పెద్దపల్లి పట్టణంలోని ఎం.బి. గార్డెన్‌లో నిర్వహించిన హమాలీ వర్కర్స్ అసోసియేషన్ (హెచ్‌ఎండబ్ల్యూఏ) దశాబ్ది వేడుకలకు ఆయన ముఖ్య అతిథిగా హాజరయ్యారు.
కార్మికుల హక్కుల పరిరక్షణకు కృషి.
ఈ సందర్భంగా మంత్రి మాట్లాడుతూ, అన్ని రంగాల కార్మికులకు న్యాయం జరిగేలా కనీస వేతనాల పెంపునకు ప్రభుత్వం కృషి చేస్తుందని తెలిపారు. కార్మికుల కనీస వేతనాలు పెంచాల్సిన అవసరం ఉందని, ఈ అంశంపై ఎమ్మెల్సీ ప్రొఫెసర్ పి. కోదండరాం చేసిన విజ్ఞప్తిని పరిగణనలోకి తీసుకున్నట్లు పేర్కొన్నారు. కార్మికుల సంక్షేమం, హక్కుల పరిరక్షణకు కాంగ్రెస్ ప్రభుత్వం ప్రాధాన్యత ఇస్తుందని స్పష్టం చేశారు. కార్మికులతో తమ కుటుంబానికి విడదీయలేని అనుబంధం ఉందని వివేక్ వెంకటస్వామి తెలిపారు. తన తండ్రి కాకా వెంకటస్వామి కార్మికుల సంక్షేమం కోసం చేసిన సేవలను గుర్తుచేశారు. గతంలో గోదాముల నిర్మాణ సమయంలో ప్రమాదానికి గురైన హమాలీ కార్మికుడికి తమ విశాఖ చారిటబుల్ ట్రస్ట్ ద్వారా ఆర్థిక సహాయం అందించినట్లు వివరించారు. కార్మికుల ఆదరణ, అభిమానాల వల్లే తాము ఈ స్థాయికి చేరుకున్నామని పేర్కొన్నారు.
ఎఫ్‌సీఐ కార్మికుల సమస్యలపై పోరాడాలి.
పెద్దపల్లి ఎంపీ గడ్డం వంశీకృష్ణ ఫుడ్ కార్పొరేషన్ ఆఫ్ ఇండియా (ఎఫ్‌సీఐ) కార్మికుల సమస్యల పరిష్కారం కోసం పార్లమెంట్‌లో గళమెత్తాలని మంత్రి కోరారు. సింగరేణి కార్మికుల పెన్షన్ల కోసం పోరాడినట్లుగానే ఎఫ్‌సీఐ కార్మికుల హక్కులు, సంక్షేమం కోసం కృషి చేయాలని సూచించారు. గిగ్ వర్కర్ల సంక్షేమం కోసం తెలంగాణలో బోర్డు ఏర్పాటు చేసిన విషయాన్ని ప్రస్తావిస్తూ, కార్మికుల అభ్యున్నతికి ప్రభుత్వం కట్టుబడి ఉందన్నారు. ఈ కార్యక్రమంలో పెద్దపల్లి ఎంపీ గడ్డం వంశీకృష్ణ, పెద్దపల్లి ఎమ్మెల్యే విజయరమణారావు, ఎమ్మెల్సీ ప్రొఫెసర్ పి. కోదండరాం, హమాలీ వర్కర్స్ సంఘం నాయకులు, కార్మికులు తదితరులు పాల్గొన్నారు.
