అల్లు అర్జున్ జోడీగా శ్రద్ధా కపూర్..
– లోకేష్ భారీ ప్లాన్.. డబుల్ సెన్సేషన్..!
జనం వాయిస్, హైదరాబాద్:
టాలీవుడ్ ఐకాన్ స్టార్ అల్లు అర్జున్ మరియు కోలీవుడ్ సెన్సేషనల్ దర్శకుడు లోకేష్ కనగరాజ్ కాంబినేషన్లో తెరకెక్కబోయే ప్రతిష్టాత్మక చిత్రంపై అంచనాలు రోజురోజుకూ పెరుగుతున్నాయి. ఏఏ23 వర్కింగ్ టైటిల్తో రూపుదిద్దుకుంటున్న ఈ ప్రాజెక్ట్ త్వరలోనే సెట్స్పైకి వెళ్లనుందని సినీ వర్గాలు చెబుతున్నాయి. ఈ నేపథ్యంలో ఈ సినిమాలో కథానాయికగా బాలీవుడ్ బ్యూటీ శ్రద్ధా కపూర్ను ఎంపిక చేసినట్లు వినిపిస్తున్న వార్తలు నెట్టింట హాట్ టాపిక్గా మారాయి.
ఇటీవల భారీ విజయాన్ని అందుకున్న శ్రద్ధా కపూర్ ఇప్పటికే ప్రభాస్తో కలిసి నటించిన అనుభవం ఉండటంతో తెలుగు ప్రేక్షకులకు సుపరిచితమే. ఇప్పుడు అల్లు అర్జున్ సరసన నటించే అవకాశం దక్కితే టాలీవుడ్లో మరోసారి సెన్సేషన్ ఖాయం అనే టాక్ వినిపిస్తోంది. లోకేష్ కనగరాజ్ సినిమాల్లో సాధారణంగా హీరో క్యారెక్టర్కు ఎక్కువ ప్రాధాన్యం ఉంటుందన్న అభిప్రాయం ఉన్నప్పటికీ, ఈ చిత్రంలో హీరోయిన్ పాత్ర చాలా కీలకంగా, బలమైన ప్రాధాన్యంతో ఉంటుందని సమాచారం.
ప్రస్తుతం అల్లు అర్జున్ అట్లీ దర్శకత్వంలో రూపొందుతున్న సినిమాతో బిజీగా ఉన్నాడు. ఆ సినిమా పూర్తైన తర్వాత లోకేష్ కనగరాజ్ ప్రాజెక్ట్పై పూర్తి దృష్టి పెట్టనున్నాడు. ఈ చిత్రం లోకేష్ సినిమాటిక్ యూనివర్స్లో భాగమా లేక ప్రత్యేకంగా రూపొందించే స్వతంత్ర చిత్రమా అనే విషయంపై ఇంకా స్పష్టత రావాల్సి ఉంది. అయినప్పటికీ అల్లు అర్జున్, లోకేష్ కనగరాజ్, శ్రద్ధా కపూర్ కాంబినేషన్ ఖరారైతే బాక్సాఫీస్ వద్ద భారీ అంచనాలు నెలకొనడం ఖాయమని సినీ విశ్లేషకులు అభిప్రాయపడుతున్నారు.