ఇంటి తాళాలు పగులగొట్టి చోరీ.. ఇద్దరు అరెస్ట్.
- బంగారు, వెండి ఆభరణాలతో పాటు బైక్ స్వాధీనం.
- పలు చోరీ కేసుల్లో నిందితుడి ప్రమేయం..
- మంథని సిఐ బి. స్వామి.
జనం వాయిస్, మంథని, సెప్టెంబర్ 22:
రాత్రివేళ ఇంటి తాళాలు పగులగొట్టి బంగారు, వెండి ఆభరణాలను చోరీ చేసిన కేసును మంథని పోలీసులు ఛేదించారు. ఈ ఘటనకు సంబంధించి ఇద్దరు వ్యక్తులను అదుపులోకి తీసుకోగా, ప్రధాన నిందితుడిగా గుర్తించిన తాటికొండ స్వామిశరణ్ @ మున్నాను అరెస్ట్ చేశారు. అతని వద్ద నుంచి చోరీకి గురైన బంగారు, వెండి ఆభరణాలతో పాటు నంబర్ ప్లేట్ లేని మోటార్‌సైకిల్‌ను పోలీసులు స్వాధీనం చేసుకున్నారు. పోలీసుల వివరాల ప్రకారం.. మంథని మండలం అడవిసోమనపల్లి గ్రామంలో సెప్టెంబర్ 17వ తేదీ రాత్రి నుంచి 18వ తేదీ ఉదయం మధ్య గుర్తుతెలియని వ్యక్తులు ఓ ఇంటి తాళాలు పగులగొట్టి లోపలికి ప్రవేశించారు. అనంతరం అల్మారాను తెరిచి బంగారు, వెండి ఆభరణాలను అపహరించారు. బాధితుడు పంగా శ్రీకాంత్ ఇచ్చిన ఫిర్యాదు మేరకు మంథని పోలీస్ స్టేషన్‌లో క్రైం నంబర్ 224/2026 కింద బీఎన్‌ఎస్‌లోని 331(4), 305 సెక్షన్ల కింద కేసు నమోదు చేసి దర్యాప్తు చేపట్టారు. దర్యాప్తులో భాగంగా సమీపంలోని కిరాణా దుకాణం వద్ద ఉన్న సీసీటీవీ ఫుటేజీలను పోలీసులు పరిశీలించారు. విశ్వసనీయ సమాచారం ఆధారంగా మంథని సీఐ ఆధ్వర్యంలోని పోలీసు బృందం మంగళవారం మధ్యాహ్నం 2.30 గంటల సమయంలో మంథని ‘వై’ జంక్షన్ వద్ద మోటార్‌సైకిల్‌పై వెళ్తున్న ఇద్దరిని అదుపులోకి తీసుకుంది. విచారణలో అడవిసోమనపల్లి చోరీకి పాల్పడినట్లు వారు అంగీకరించినట్లు పోలీసులు తెలిపారు.
భారీగా ఆభరణాల స్వాధీనం..
నిందితుల వద్ద నుంచి 23.2 గ్రాముల బంగారు నెక్లెస్‌తో పాటు బంగారు ఉంగరం, లాకెట్లు, చెవి ఆభరణాలు, మాటీలు తదితర బంగారు వస్తువులను స్వాధీనం చేసుకున్నారు. అలాగే 172.4 గ్రాముల వెండి పట్టీలు, 91.5 గ్రాముల వెండి కడియాలు, వెండి నడుము దారం, మెట్టెలను కూడా పోలీసులు స్వాధీనం చేసుకున్నారు. వీటితో పాటు నంబర్ ప్లేట్ లేని హీరో హోండా ప్యాషన్ ప్రో మోటార్‌సైకిల్‌ను స్వాధీనం చేసుకున్నారు.
పలు చోరీ కేసుల్లో ప్రమేయం..
అరెస్టైన తాటికొండ స్వామిశరణ్ @ మున్నా, 21, పెయింటర్‌గా పనిచేస్తున్నట్లు పోలీసులు తెలిపారు. ములుగు జిల్లా గోవిందరావుపేట మండలం పస్రా గ్రామానికి చెందిన ఇతను ప్రస్తుతం మంచిర్యాలలోని రాజీవ్‌నగర్‌లో నివసిస్తున్నట్లు పేర్కొన్నారు. ఇతనికి గతంలో కాటారం, ఘన్‌పూర్, సుబేదారి, మంథని, పస్రా, మంచిర్యాల టౌన్, నస్పూర్, హాజీపూర్ తదితర పోలీస్ స్టేషన్ల పరిధిలో నమోదైన పలు చోరీ, ఇంటి తాళాలు పగులగొట్టి చోరీ చేసిన కేసుల్లో ప్రమేయం ఉన్నట్లు పోలీసులు గుర్తించారు. ఇతనితో పాటు అదుపులోకి తీసుకున్న మరో వ్యక్తిపై చట్ట ప్రకారం తదుపరి చర్యలు కొనసాగుతున్నాయని పోలీసులు తెలిపారు. అతని వివరాలను ప్రస్తుతం వెల్లడించలేదు. అరెస్టు చేసిన స్వామిశరణ్‌ను మంథని ప్రిన్సిపల్ జ్యుడీషియల్ మేజిస్ట్రేట్ ఆఫ్ ఫస్ట్ క్లాస్ ఎదుట హాజరుపరిచి న్యాయ రిమాండ్‌కు తరలించేందుకు చర్యలు చేపట్టారు. కేసు దర్యాప్తు కొనసాగుతోంది.
పోలీసుల విజ్ఞప్తి
తమ పరిసర ప్రాంతాల్లో ఇంటి తాళాలు పగులగొట్టే ఘటనలు లేదా అనుమానాస్పద వ్యక్తుల సంచారం కనిపిస్తే వెంటనే మంథని పోలీస్ స్టేషన్ లేదా సీఐకి సమాచారం అందించాలని పోలీసులు ప్రజలను కోరారు. సమాచారం అందించే వారి వివరాలను గోప్యంగా ఉంచుతామని తెలిపారు.కేసును ఛేదించిన మంథని పోలీస్ స్టేషన్ సిబ్బందిని రామగుండం పోలీస్ కమిషనర్ అభినందించినట్లు సీఐ బి. స్వామి తెలిపారు.
