గోదావరిఖని అక్షితరాణి హత్యకేసులో ట్విస్ట్.. లెక్చరరే హంతకుడు!
- గోదావరిఖని యువతిది ఆత్మహత్య కాదని తేల్చిన పోలీసులు.
- ప్రేమ పేరుతో దగ్గరై, విద్యార్థిని ప్రాణం తీసిన కాంట్రాక్ట్ లెక్చరర్.
- మరో వ్యక్తితో చనువుగా ఉందని కక్ష పెంచుకుని ఘాతుకం.
- ఆత్మహత్యగా చిత్రీకరించి, నేరాన్ని వేరొకరిపై నెట్టేందుకు విఫలయత్నం.
- సీసీ ఫుటేజ్, కాల్ డేటాతో నిందితుడు నవీన్‌ను అరెస్ట్ చేసిన అధికారులు.
జనం వాయిస్, గోదావరిఖని, సెప్టెంబర్ 22:
పాఠాలు చెప్పాల్సిన గురువే దారి తప్పాడు. ప్రేమ పేరుతో ఒక విద్యార్థినిని నమ్మించి, చివరికి ఆమె ప్రాణాలనే బలిగొన్నాడు. మరొకరితో చనువుగా ఉంటోందన్న అనుమానంతో పగ పెంచుకుని, గడ్డి మందు తాగించి హత్య చేశాడు. ఆ నేరాన్ని ఇంకొకరిపై నెట్టేందుకు ఆత్మహత్యగా చిత్రీకరించే ప్రయత్నం చేశాడు. పెద్దపల్లి జిల్లా గోదావరిఖనిలో సంచలనం సృష్టించిన యువతి అక్షితరాణి ఆత్మహత్య కేసును పోలీసులు ఛేదించారు. ఇది ఆత్మహత్య కాదని, పక్కా ప్రణాళికతో చేసిన హత్య అని తేల్చారు. ఈ కేసుకు సంబంధించిన వివరాలను పెద్దపల్లి డీసీపీ రాంరెడ్డి ఆదివారం మీడియాకు వెల్లడించారు.
అసలేం జరిగిందంటే..
మంచిర్యాల జిల్లా నస్పూర్‌లోని పాలిటెక్నిక్ కళాశాలలో కాంట్రాక్ట్ లెక్చరర్‌గా పనిచేస్తున్న జెట్టి నవీన్ (38), అదే కళాశాలలో చదువుతున్న తాండ్ర అక్షితరాణి (20)ని ప్రేమ పేరుతో లోబరుచుకున్నాడు. సుల్తానాబాద్ మండలం గర్రెపల్లికి చెందిన వీరిద్దరూ ఒకే ఊరు కావడంతో అక్షిత అతడిని నమ్మింది. అయితే, అప్పటికే నవీన్‌కు పెళ్లై ఇద్దరు పిల్లలు ఉన్నారు. భార్యతో విభేదాల కారణంగా వేరుగా ఉంటున్నాడు. వీరి ప్రేమ వ్యవహారం ఊర్లో తెలియడంతో అక్షిత కుటుంబం గోదావరిఖనికి వలస వచ్చింది.
డిప్లొమా పూర్తయ్యాక అక్షిత హైదరాబాద్‌లోని ఉస్మానియా యూనివర్సిటీలో ఇంజినీరింగ్‌లో చేరింది. ఈ ఏడాది ఫిబ్రవరిలో శిక్షణ కోసం గోదావరిఖనిలోని సింగరేణి గనికి వచ్చింది. అక్కడ ఆమెకు మెంటార్‌గా వ్యవహరించిన ఓవర్‌మెన్ బొమ్మకంటి రవికుమార్‌తో పరిచయం ఏర్పడింది. ఈ క్రమంలో వారిద్దరూ చనువుగా ఉండటాన్ని నవీన్ సహించలేకపోయాడు. గతంలోనే అక్షిత ఫోన్‌లో ఆమెకు తెలియకుండా ఒక స్పై యాప్‌ను ఇన్‌స్టాల్ చేసిన నవీన్, ఆమె సంభాషణలను రహస్యంగా గమనించేవాడు. రవికుమార్‌తో ఆమె చనువుగా ఉండటాన్ని చూసి పగ పెంచుకున్నాడు.
హత్య చేసి.. ఆత్మహత్యగా చిత్రీకరణ
రవికుమార్‌పై కక్ష తీర్చుకోవాలని నిర్ణయించుకున్న నవీన్, మొదట అతడిపై లైంగిక వేధింపుల ఆరోపణలతో సింగరేణి అధికారులకు అక్షితతో ఫిర్యాదు చేయించాడు. కానీ, ఆధారాలు లేకపోవడంతో అధికారులు చర్యలు తీసుకోలేదు. ఈ క్రమంలోనే అక్షితను అంతమొందించి, ఆ నేరాన్ని రవికుమార్‌పై నెట్టేందుకు నవీన్ పథకం పన్నాడు.
ఈ నెల 12న అక్షితను కలవాలని పిలిచి, తన కారులో ఎక్కించుకుని తిరుగుతూ గొడవపడ్డాడు. రవికుమార్‌పై కేసు పెట్టాలంటే ఆత్మహత్యాయత్నం చేయాలని నమ్మించి, బలవంతంగా ఆమెతో గడ్డి మందు తాగించాడు. ఆ తర్వాత, తన చావుకు రవికుమారే కారణమంటూ ఆమె చేత ఒక లేఖ రాయించి, దాన్ని ఫోన్‌లో ఫొటో తీశాడు. అక్షిత అపస్మారక స్థితికి చేరుకునే వరకు కారులోనే తిప్పి, ఆమె బతకదని నిర్ధారించుకున్నాక ఆమె తండ్రికి ఫోన్ చేశాడు. ‘మీ అమ్మాయి ఆత్మహత్యాయత్నం చేసింది’ అని చెప్పి, వారి ఇంటి వద్ద వదిలివెళ్లాడు. ఆసుపత్రిలో చికిత్స పొందుతూ అక్షిత 13న మరణించింది.
సాంకేతిక ఆధారాలతో చిక్కిన నిందితుడు
మొదట అక్షిత ఫోన్‌లోని లేఖ ఆధారంగా రవికుమార్‌పై కేసు నమోదు చేసిన పోలీసులు, దర్యాప్తులో భాగంగా సీసీ ఫుటేజీని పరిశీలించారు. అక్షిత, నవీన్ కారులో ఎక్కినట్లు గుర్తించారు. నవీన్ కాల్ డేటా, రికార్డింగ్‌లు, ఇతర సాంకేతిక ఆధారాలను విశ్లేషించగా అసలు నిజం బయటపడింది. నవీన్‌ను అదుపులోకి తీసుకుని విచారించగా, తానే హత్య చేసినట్లు అంగీకరించాడు. దీంతో ప్రధాన నిందితుడు నవీన్‌తో పాటు, ఆరోపణలు ఎదుర్కొంటున్న రవికుమార్‌ను కూడా పోలీసులు అరెస్ట్ చేశారు.