ఉచితంగా సినిమాలు చూసే యాప్లు వాడుతున్నారా?
– వెంటనే ఆపేయండి.. లేదంటే భారీ ప్రమాదమే!
జనం వాయిస్, హైదరాబాద్,డిసెంబర్ 28:
ఈ రోజుల్లో కొత్త సినిమా విడుదలైతే చాలు, థియేటర్కు వెళ్లకుండా మొబైల్లోనే చూసేయాలనే అలవాటు చాలా మందిలో పెరిగింది. ముఖ్యంగా ఉచితంగా సినిమాలు చూపిస్తామని చెప్పే యాప్లకు యువత ఎక్కువగా ఆకర్షితులవుతోంది. కానీ ఈ అలవాటు మిమ్మల్ని తెలియకుండానే తీవ్రమైన సైబర్ ప్రమాదాల్లోకి నెట్టేస్తోందని నిపుణులు హెచ్చరిస్తున్నారు.ఉచిత సినిమాల కోసం డౌన్లోడ్ చేసుకునే పైరసీ యాప్లు మీ ఫోన్లోకి మాల్వేర్, స్పైవేర్ వంటి హానికర సాఫ్ట్వేర్ను చొప్పించే అవకాశం ఉందని కేంద్ర ప్రభుత్వ సైబర్ భద్రతా విభాగం తాజాగా స్పష్టం చేసింది. ఈ యాప్ల ద్వారా మీ వ్యక్తిగత సమాచారం, బ్యాంక్ వివరాలు, లాగిన్ ఐడీలు, పాస్వర్డులు సులభంగా దొంగల చేతికి వెళ్లే ప్రమాదం ఉందని తెలిపింది. ఒకసారి ఈ యాప్లు ఫోన్లో ఇన్స్టాల్ అయితే, వినియోగదారుడికి తెలియకుండానే బ్యాంక్ ఖాతాల నుంచి డబ్బులు మాయం అయ్యే ఘటనలు కూడా జరుగుతున్నాయని హెచ్చరించింది.
అంతేకాదు, పైరసీ కంటెంట్ను వినియోగించడం చట్టపరంగా నేరమని అధికారులు గుర్తు చేస్తున్నారు. ఇలాంటి యాప్లను వాడటం ద్వారా కేవలం డేటా భద్రతే కాదు, చట్టపరమైన ఇబ్బందులు కూడా ఎదురయ్యే అవకాశముంది. అవసరమైన అనుమతులు లేకుండా సినిమాలను ప్రసారం చేసే యాప్లను డౌన్లోడ్ చేయడం వల్ల మీపై కేసులు నమోదయ్యే ప్రమాదం ఉందని చెబుతున్నారు.
నిపుణుల సూచన ప్రకారం, సినిమాలు చూడాలంటే అధికారిక ఓటీటీ వేదికలను మాత్రమే ఉపయోగించాలి. కొద్ది రూపాయలు ఆదా చేయాలనే ఆశలో ఉచిత యాప్లను వాడితే, మీ జీవితాంతం కష్టాలు ఎదుర్కోవాల్సి వచ్చే పరిస్థితి తలెత్తవచ్చని వారు హెచ్చరిస్తున్నారు. మీ మొబైల్, మీ డేటా, మీ డబ్బు భద్రత మీ చేతుల్లోనే ఉందని గుర్తించి, ఇప్పటికైనా ఉచిత సినిమా యాప్లకు దూరంగా ఉండటమే మంచిదని స్పష్టం చేస్తున్నారు.
Discover more from janamvoice.com
Subscribe to get the latest posts sent to your email.
Recent Comments