క్రెడిట్ కార్డు హోల్డర్ చనిపోతే బాకీ ఏమవుతుంది..? బ్యాంక్ ఏం చేస్తుందంటే..

📰 Generate e-Paper Clip

క్రెడిట్ కార్డు హోల్డర్ చనిపోతే బాకీ ఏమవుతుంది..? బ్యాంక్ ఏం చేస్తుందంటే..

జనం వాయిస్, వెబ్ డెస్క్:

నేటి రోజుల్లో క్రెడిట్ కార్డుల వినియోగం సాధారణమైంది. చాలామందికి ఒకటి కంటే ఎక్కువ కార్డులు ఉన్నాయి. అయితే కార్డుదారుడు అనుకోకుండా మరణిస్తే కార్డుపై ఉన్న బకాయి ఏమవుతుంది అనే సందేహం చాలా మందిలో ఉంటుంది. ఆ పరిస్థితిలో కుటుంబ సభ్యులపై భారం పడుతుందా లేదా అనే అంశంపై స్పష్టత అవసరం. సాధారణంగా క్రెడిట్ కార్డు బకాయి చెల్లించే బాధ్యత కార్డుదారుడిదే. అతడు మరణించిన తర్వాత బ్యాంకు ముందుగా అతని ఆస్తులను పరిశీలిస్తుంది. భూములు, ఇల్లు, పెట్టుబడులు లేదా ఇతర ఆర్థిక ఆస్తులు ఉంటే వాటి విలువ మేరకు బకాయిని వసూలు చేసే హక్కు బ్యాంకుకు ఉంటుంది. ఆస్తుల విలువ సరిపోతే బకాయి అక్కడితో ముగుస్తుంది.
మరణించిన వ్యక్తికి ఎలాంటి ఆస్తులు లేకపోతే లేదా ఆస్తుల విలువ బకాయికి సరిపోకపోతే మిగిలిన మొత్తాన్ని కుటుంబ సభ్యులపై వేయరు. భార్య, భర్త, పిల్లలు లేదా బంధువులు ఆ బకాయిని చెల్లించాల్సిన చట్టబద్ధమైన బాధ్యత ఉండదు. అటువంటి సందర్భంలో ఆ రుణాన్ని బ్యాంకు మొండి బకాయిగా పరిగణిస్తుంది. దేశంలోని కేంద్ర బ్యాంకు మార్గదర్శకాల ప్రకారం రుణ వసూలు కోసం కుటుంబ సభ్యులను బెదిరించడం, ఒత్తిడి చేయడం లేదా వేధించడం నిషేధం. శారీరకంగా గానీ, మానసికంగా గానీ వేధింపులకు పాల్పడకూడదని బ్యాంకులకు స్పష్టమైన ఆదేశాలు ఉన్నాయి. కార్డుదారుడి మరణం తర్వాత అతని కుటుంబ సభ్యులను రుణం చెల్లించాలంటూ బలవంతం చేయడం చట్టవిరుద్ధం.అయితే ఫిక్స్‌డ్ డిపాజిట్ ఆధారంగా జారీ చేసిన క్రెడిట్ కార్డుల విషయంలో పరిస్థితి భిన్నంగా ఉంటుంది. అలాంటి సందర్భాల్లో కార్డుకు లింక్ చేసిన డిపాజిట్ నుంచి బకాయిని సర్దుబాటు చేసుకునే హక్కు బ్యాంకుకు ఉంటుంది. మొత్తం మీద సాధారణ క్రెడిట్ కార్డుల విషయంలో కార్డుదారుడు మరణిస్తే కుటుంబ సభ్యులు భయపడాల్సిన అవసరం లేదని ఆర్థిక నిపుణులు చెబుతున్నారు.