తెలంగాణ రాష్ట్ర సేన ఆవిర్భావం.

📰 Generate e-Paper Clip

తెలంగాణ రాష్ట్ర సేన ఆవిర్భావం.

కవిత సంచలన నిర్ణయం.
బీఆర్ఎస్‌పై ఘాటు విమర్శలు.
కుటుంబ రాజకీయాల్లో విభేదాల వెల్లడి.
కొత్త పార్టీ లక్ష్యాల ప్రకటన.

జనం వాయిస్, హైదరాబాద్, ఏప్రిల్ 25:

తెలంగాణ రాజకీయాల్లో మరో కీలక మలుపు తిరిగింది. తెలంగాణ జాగృతి అధ్యక్షురాలు కల్వకుంట్ల కవిత కొత్త రాజకీయ పార్టీని ప్రకటించడం రాష్ట్రవ్యాప్తంగా చర్చనీయాంశమైంది. ‘తెలంగాణ రాష్ట్ర సేన’ పేరుతో తన రాజకీయ ప్రయాణాన్ని కొత్త దిశలో ప్రారంభిస్తూ కవిత రాజకీయ వర్గాల్లో సంచలనం సృష్టించారు. మేడ్చల్-మల్కాజిగిరి జిల్లా మునీరాబాద్‌లోని అద్వయ కన్వెన్షన్‌లో నిర్వహించిన భారీ సభలో కవిత పార్టీ పేరుతో పాటు జెండాను కూడా ఆవిష్కరించారు. పసుపు, ఆకుపచ్చ, నీలం రంగులతో రూపొందించిన జెండా మధ్యలో తెలంగాణ మ్యాప్ ఉండగా, దానిపై పార్టీ పేరును ప్రతిబింబించే అక్షరాలు కనిపించాయి. ఈ సభకు పెద్ద ఎత్తున కార్యకర్తలు, అనుచరులు హాజరై కొత్త పార్టీకి మద్దతు తెలిపారు. సభలో మాట్లాడిన కవిత బీఆర్ఎస్ పార్టీపై తీవ్ర స్థాయిలో విమర్శలు గుప్పించారు. పార్టీ తెలంగాణ ఆత్మను కోల్పోయిందని, నాయకత్వం ప్రజల సమస్యల నుండి దూరమైందని ఆరోపించారు. ఉద్యమ నాయకుడిగా పేరొందిన కేసీఆర్ అభివృద్ధి మార్గం తప్పిందని, ప్రస్తుతం ఉన్న పరిస్థితులు ప్రజలకు అనుకూలంగా లేవని పేర్కొన్నారు.
తన తండ్రి కేసీఆర్‌పై కూడా కవిత సంచలన వ్యాఖ్యలు చేశారు. గతంలో ఉన్న నాయకత్వం ప్రస్తుతం మారిపోయిందని, ప్రజల కోసం పనిచేసే స్వభావం తగ్గిపోయిందని విమర్శించారు. రాష్ట్రంలో ప్రజలు కష్టాల్లో ఉన్నా స్పందన లేకపోవడం బాధాకరమని చెప్పారు. కాళేశ్వరం ప్రాజెక్టులో అవినీతి జరిగిందని తాను ముందే హెచ్చరించినా పట్టించుకోలేదని ఆరోపించారు. తనను పార్టీ నుంచి తప్పించడం తనకు స్వేచ్ఛనిచ్చిందని, ఇప్పుడు రాష్ట్ర ప్రజల కోసం నిస్వార్థంగా పోరాడతానని కవిత వెల్లడించారు. గతంలో జరిగిన తప్పుల్లో తన పాత్ర ఉన్నదని అంగీకరిస్తూ, వాటిని సరిదిద్దుకోవడానికి ఈ కొత్త రాజకీయ ప్రయాణం ప్రారంభించానని చెప్పారు.
సామాజిక తెలంగాణ సాధనే తమ పార్టీ ప్రధాన లక్ష్యమని కవిత స్పష్టం చేశారు. రాష్ట్రంలోని ప్రతి వర్గానికి న్యాయం చేయడం, ప్రజల సమస్యలను పరిష్కరించడం తమ ముఖ్య ధ్యేయమని చెప్పారు. రెండు సంవత్సరాల్లో అధికారంలోకి వచ్చి, తెలంగాణకు ముఖ్యమంత్రిగా బాధ్యతలు చేపడతానని ధీమా వ్యక్తం చేశారు. పార్టీ ప్రకటనకు ముందు బంజారాహిల్స్ నివాసంలో సర్వమత ప్రార్థనలు నిర్వహించి, గన్ పార్క్‌లో అమరవీరుల స్మారక స్థూపం వద్ద నివాళులర్పించడం ద్వారా తన సంకల్పాన్ని తెలియజేశారు.