వినాయక చవితి రోజు చంద్రుడిని ఎందుకు చూడకూడదు? ఆ ఒక్క నవ్వు వెనుక ఇంత పెద్ద కథ ఉందా?

📰 Generate e-Paper Clip

వినాయక చవితి రోజు చంద్రుడిని ఎందుకు చూడకూడదు? ఆ ఒక్క నవ్వు వెనుక ఇంత పెద్ద కథ ఉందా?

• కిందపడిన వినాయకుడిని చూసి చంద్రుడు నవ్వాడని పురాణ కథ.
• దీంతో చంద్రుడికి వినాయకుడి శాపం.
• చంద్రుడిని చూస్తే నిందలు వస్తాయని విశ్వాసం.
• తన తప్పును అంగీకరించి చంద్రుడు క్షమాపణ కోరినట్లు కథలు.
• దీంతో శాప ప్రభావాన్ని వినాయకుడు తగ్గించినట్లు నమ్మకం.

జనం వాయిస్, వెబ్ డెస్క్, సెప్టెంబర్ 14:

వినాయక చవితి వచ్చిందంటే ఇళ్లలో సందడి మొదలవుతుంది. వినాయకుడి ప్రతిమలు, పూజలు, నైవేద్యాలతో వాతావరణం భక్తిమయం అవుతుంది. అయితే ఇదే రోజున ఓ ఆసక్తికరమైన మాటను పెద్దలు పదేపదే చెబుతుంటారు. వినాయక చవితి రోజు రాత్రి చంద్రుడిని చూడకూడదట! పొరపాటున చంద్రుడిని చూస్తే నిందలు, నేరారోపణలు ఎదురయ్యే అవకాశం ఉందని చెబుతారు. అసలు ఈ నమ్మకం వెనుక కథేంటి? చంద్రుడికి వినాయకుడికి మధ్య ఏం జరిగింది?

ఆ రోజు వినాయకుడికి ఎదురైన అవమానం
పురాణ కథనం ప్రకారం.. ఓ రోజు వినాయకుడు తనకు ఎంతో ఇష్టమైన ఉండ్రాళ్లు, మోదకాలు తిన్నాడు. కడుపు నిండడంతో తన వాహనం మూషికంపై ఇంటికి బయలుదేరాడు. మార్గమధ్యంలో ఓ పాము కనిపించడంతో మూషికం భయపడి ఒక్కసారిగా కదిలింది. దీంతో వినాయకుడు కిందపడిపోయాడు.

ఆ దృశ్యాన్ని ఆకాశంలో ఉన్న చంద్రుడు చూశాడు. వినాయకుడు పడిపోవడాన్ని చూసి చంద్రుడు నవ్వాడు. ఆ నవ్వులో పరిహాసం కనిపించడంతో వినాయకుడికి కోపం వచ్చింది. తనను చూసి చంద్రుడు ఎగతాళి చేస్తున్నాడని భావించాడు.

చంద్రుడిపై వినాయకుడి శాపం
అవమానంగా భావించిన వినాయకుడు చంద్రుడిని శపించాడు. వినాయక చవితి రోజు చంద్రుడిని చూసిన వారికి అనవసరమైన నిందలు, తప్పుడు ఆరోపణలు ఎదురవుతాయని శాపం ఇచ్చినట్లు పురాణ కథ చెబుతోంది.

చంద్రుడి అందం, వెలుగుతో అతడిలో గర్వం పెరిగిందని ఈ కథలో చెబుతారు. ఆ గర్వమే ఇతరులను తక్కువగా చూడటానికి కారణమైందని… దీంతో వినాయకుడి శాపం కేవలం చంద్రుడికి ఇచ్చిన శిక్షగానే కాకుండా.. అహంకారానికి ఓ గుణపాఠంగా కూడా ఈ కథను చూస్తారు.

క్షమాపణతో తగ్గిన శాప ప్రభావం
తన తప్పు తెలుసుకున్న చంద్రుడు వినాయకుడిని వేడుకున్నాడు. తనను క్షమించాలని ప్రార్థించాడు. చంద్రుడి పశ్చాత్తాపాన్ని చూసిన వినాయకుడు మనసు మార్చుకున్నాడు. శాపాన్ని పూర్తిగా తొలగించకుండా దాని ప్రభావాన్ని తగ్గించినట్లు పురాణ గాథ చెబుతోంది.

అప్పటినుంచే వినాయక చవితి రోజు చంద్రుడిని చూడకూడదనే నమ్మకం కొనసాగుతోందని చెబుతారు. ఒకవేళ అనుకోకుండా చంద్రుడిని చూసినా.. తప్పుడు నిందలు వస్తాయనే భయపడాల్సిన అవసరం లేదని, వినాయకుడిని ప్రార్థించడం ద్వారా పరిహారం చేసుకోవచ్చనే విశ్వాసం కూడా ఉంది.

అందుకే ప్రతి వినాయక చవితికి “ఈ రోజు చంద్రుడి వైపు చూడొద్దు” అని పెద్దలు హెచ్చరిస్తుంటారు. ఓ చిన్న సంఘటనతో మొదలైన ఈ పురాణ గాథ.. అహంకారం, పరిహాసం ఎలాంటి పరిణామాలకు దారితీయవచ్చో చెప్పే ఆసక్తికరమైన కథగా తరతరాలుగా కొనసాగుతోంది.