అమ్మా తీసుకెళ్లు అంటూ గుండెలు పిండేసిన చిన్నారి.. చివరికి తల్లిదండ్రుల చెంతకు!

📰 Generate e-Paper Clip

అమ్మా తీసుకెళ్లు అంటూ గుండెలు పిండేసిన చిన్నారి.. చివరికి తల్లిదండ్రుల చెంతకు!

• మూడేళ్ల బాలుడు రుద్ర మహేశ్ తిరిగి దత్తత తల్లిదండ్రుల చెంతకు.
• ‘అమ్మా తీసుకెళ్లు’ అంటూ చిన్నారి ఏడ్చిన వీడియో వైరల్
• తెలంగాణ హైకోర్టు జోక్యంతో సుఖాంతమైన కస్టడీ వివాదం.
• జిల్లా కలెక్టర్ హామీతో వేగవంతమైన అప్పగింత ప్రక్రియ
• చట్టబద్ధత కారణంతో బాలుడిని శిశు సంరక్షణ కేంద్రానికి తరలించిన అధికారులు.

జనం వాయిస్, జగిత్యాల, నవంబర్ 3:

జగిత్యాల జిల్లాలో తీవ్ర ఉత్కంఠ రేపిన మూడేళ్ల బాలుడు రుద్ర మహేశ్ కస్టడీ వివాదం సుఖాంతమైంది. తెలంగాణ హైకోర్టు, జిల్లా యంత్రాంగం జోక్యంతో చిన్నారిని దాదాపు మూడేళ్లుగా పెంచుకుంటున్న దంపతులకు అధికారులు అప్పగించారు. వారాల తరబడి అనుభవించిన వేదనకు తెరపడటంతో ఆ తల్లిదండ్రుల ఆనందానికి అవధుల్లేకుండా పోయాయి.

కరీంనగర్‌లోని శిశు సంరక్షణ కేంద్రంలో “అమ్మా, నన్ను ఇంటికి తీసుకెళ్లు.. నాకు భయంగా ఉంది!” అంటూ బాలుడు తన పెంపుడు తల్లి సరితను చూసి ఏడుస్తున్న వీడియో సోషల్ మీడియాలో వైరల్ కావడంతో ఈ ఘటన తెలుగు రాష్ట్రాల్లో తీవ్ర చర్చనీయాంశమైంది. చిన్నారి ఆవేదన ప్రతి ఒక్కరినీ కదిలించింది.

జగిత్యాలకు చెందిన కాసారపు శ్రీనివాస్, సరిత దంపతులు సంతానం లేకపోవడంతో రుద్ర మహేశ్‌ను ఐదు రోజుల పసికందుగా ఉన్నప్పటి నుంచి పెంచుకుంటున్నారు. హిందూ సంప్రదాయం ప్రకారమే తాము దత్తత తీసుకున్నామని వారు చెబుతున్నారు. అయితే, ఈ దత్తతకు చట్టబద్ధత లేదని అధికారులు బాలుడిని వారి నుంచి వేరుచేసి కరీంనగర్‌లోని ప్రభుత్వ శిశు సంరక్షణ కేంద్రానికి తరలించారు.

దీంతో బాలుడి కస్టడీ కోసం శ్రీనివాస్, సరిత దంపతులు తెలంగాణ హైకోర్టును ఆశ్రయించారు. వారి వాదనలు విన్న న్యాయస్థానం, W.P. నెం. 31588/2026లో అక్టోబర్ 16న బాలుడి మధ్యంతర కస్టడీని తిరిగి వారికే అప్పగించాలని ఆదేశాలు జారీ చేసింది. అక్టోబర్ 28న కోర్టు ఉత్తర్వులను శిశు సంక్షేమ కమిటీ (సీడ‌బ్ల్యూసీ)కి సమర్పించినా, అప్పగింతలో జాప్యం జరిగిందని దంపతులు ఆరోపించారు. ఈ జాప్యంపై వారు నిన్న‌ జగిత్యాల కలెక్టరేట్‌లో జరిగిన ప్రజావాణి కార్యక్రమంలో జిల్లా కలెక్టర్‌కు ఫిర్యాదు చేశారు.

ఈ ఘటనపై స్పందించిన జగిత్యాల జిల్లా కలెక్టర్ బి. సత్య ప్రసాద్, హైకోర్టు ఆదేశాల ప్రకారమే బాలుడిని అప్పగిస్తామని హామీ ఇచ్చారు. సీడ‌బ్ల్యూసీ ఆమోదం, పరిపాలనాపరమైన లాంఛనాల కారణంగానే జాప్యం జరిగిందని, సోమవారం రాత్రి లేదా మంగళవారం ఉదయానికల్లా ప్రక్రియ పూర్తి చేస్తామని ఆయన స్పష్టం చేశారు.

కలెక్టర్ హామీ ఇచ్చిన కొద్ది గంటల్లోనే సోమవారం సాయంత్రం అధికారులు బాలుడిని శ్రీనివాస్, సరిత దంపతులకు అప్పగించారు. తాను ఎవరి వద్దకు వెళ్లాలని ఆరాటపడ్డాడో ఆ తల్లిదండ్రుల చేతుల్లోకి రుద్ర మహేశ్ చేరడంతో ఈ కథ సుఖాంతమైంది.