దివ్యాంగులకు ఉచితంగా సహాయ ఉపకరణాల పంపిణీకి ప్రత్యేక నిర్ధారణ శిబిరం.

📰 Generate e-Paper Clip

దివ్యాంగులకు ఉచితంగా సహాయ ఉపకరణాల పంపిణీకి ప్రత్యేక నిర్ధారణ శిబిరం.

జిల్లా కలెక్టర్ కోయ శ్రీహర్ష.

ఆగస్టు 17న గోదావరిఖనిలోని ఆర్‌జీ-1 సింగరేణి కమ్యూనిటీ హాల్‌లో శిబిరం.

రామగుండం, పాలకుర్తి, అంతర్గాం ప్రాంతాల దివ్యాంగులు సద్వినియోగం చేసుకోవాలి.

జనం వాయిస్, పెద్దపల్లి, ఆగస్టు 14:

రామగుండం నియోజకవర్గంలోని దివ్యాంగులకు ఉచితంగా సహాయ ఉపకరణాలు అందించేందుకు అలీంకో సంస్థ సహకారంతో ప్రత్యేక నిర్ధారణ శిబిరాన్ని నిర్వహిస్తున్నట్లు జిల్లా కలెక్టర్ కోయ శ్రీహర్ష శుక్రవారం ఒక ప్రకటనలో తెలిపారు. ఆగస్టు 17, 2026న ఉదయం 9.00 గంటల నుంచి సాయంత్రం 5.00 గంటల వరకు గోదావరిఖనిలోని ఆర్‌జీ-1 సింగరేణి కమ్యూనిటీ హాల్‌లో ఈ శిబిరం నిర్వహించనున్నట్లు కలెక్టర్ తెలిపారు. రామగుండం, పాలకుర్తి, అంతర్గాం ప్రాంతాలకు చెందిన దివ్యాంగులు మాత్రమే ఈ శిబిరానికి హాజరుకావాలని సూచించారు. శారీరక దివ్యాంగులకు బ్యాటరీ ఆపరేటెడ్ ట్రైసైకిల్, మూడు చక్రాల రిక్షా, వీల్‌చైర్, చంక కర్రలు, చేతి కర్రలు తదితర సహాయ ఉపకరణాలను అందించనున్నట్లు తెలిపారు. బ్యాటరీ ఆపరేటెడ్ ట్రైసైకిల్ పొందేందుకు కనీసం 80 శాతం శారీరక వైకల్యం కలిగి, కాళ్లకు తీవ్రమైన వైకల్యం ఉండి, చేతులు సాధారణంగా పనిచేసే దివ్యాంగులు అర్హులని పేర్కొన్నారు. బధిరులకు హియరింగ్ ఎయిడ్స్, అంధులకు ప్రత్యేక మొబైల్ ఫోన్లు, చేతి కర్రలు, మానసిక దివ్యాంగులకు ప్రత్యేక కిట్లు తదితర సహాయ ఉపకరణాలను అందించనున్నట్లు కలెక్టర్ తెలిపారు. ఇతర సహాయ ఉపకరణాలు పొందేందుకు కనీసం 40 శాతం లేదా అంతకంటే ఎక్కువ వైకల్యం కలిగి ఉండాలని పేర్కొన్నారు. శిబిరానికి హాజరయ్యే దివ్యాంగులు సదరం వైద్య ధ్రువీకరణ పత్రం లేదా జిల్లా మెడికల్ బోర్డు/అప్పీలేట్ మెడికల్ బోర్డు జారీ చేసిన వైద్య ధ్రువీకరణ పత్రం, యూడీఐడీ కార్డు లేదా యూడీఐడీ కార్డు కోసం దరఖాస్తు చేసుకున్న రసీదు, ఆధార్ కార్డు, ఇటీవల పొందిన ఆదాయ ధ్రువీకరణ పత్రం జిరాక్స్ ప్రతులను తప్పనిసరిగా వెంట తీసుకురావాలని కలెక్టర్ సూచించారు. గ్రామీణ ప్రాంతాల్లో వార్షిక ఆదాయం రూ.1.50 లక్షలు, పట్టణ ప్రాంతాల్లో రూ.2.50 లక్షలకు మించకూడదని, దరఖాస్తుదారుల వయస్సు 16 సంవత్సరాల కంటే తక్కువ ఉండకూడదని తెలిపారు. వైకల్యం స్పష్టంగా కనిపించే ఫొటోలను కూడా తీసుకురావాలని సూచించారు. యూడీఐడీ కార్డు లేని దివ్యాంగులు (https://www.swavlambancard.gov.in/?utm_source=chatgpt.com) ద్వారా ఆన్‌లైన్‌లో దరఖాస్తు చేసుకుని, దరఖాస్తు రసీదును శిబిరానికి తీసుకురావాలని జిల్లా కలెక్టర్ తెలిపారు. గత మూడు సంవత్సరాల్లో శాఖ ద్వారా ఇదే రకమైన సహాయ ఉపకరణాలు పొందిన వారికి ఈ శిబిరంలో ప్రాధాన్యత ఇవ్వబడదని స్పష్టం చేశారు. అర్హత కలిగిన దివ్యాంగులు ఈ అవకాశాన్ని సద్వినియోగం చేసుకోవాలని జిల్లా కలెక్టర్ కోయ శ్రీహర్ష కోరారు. మరిన్ని వివరాలకు 9440852495, 9550796597 నంబర్లలో సంప్రదించాలని జిల్లా కలెక్టర్  ఆ ప్రకటనలో పేర్కొన్నారు.