మంచిర్యాల గూడెంగుట్ట ఆలయానికి మహాదశ.

📰 Generate e-Paper Clip

మంచిర్యాల గూడెంగుట్ట ఆలయానికి మహాదశ.

– రూ.70 కోట్ల అభివృద్ధి పనులు.
– భూమిపూజ చేసిన ఉప ముఖ్యమంత్రి.
– ఆధ్యాత్మిక కేంద్రంగా తీర్చిదిద్దే లక్ష్యం.

జనం వాయిస్, మంచిర్యాల, జూన్ 13:

మంచిర్యాల నియోజకవర్గంలోని ప్రముఖ పుణ్యక్షేత్రం గూడెంగుట్ట శ్రీ సత్యనారాయణ స్వామి దేవాలయ అభివృద్ధి పనులకు ఉప ముఖ్యమంత్రి భట్టి విక్రమార్క భూమిపూజ నిర్వహించారు. సుమారు రూ.70 కోట్ల వ్యయంతో ఆలయాన్ని సర్వాంగసుందరంగా అభివృద్ధి చేయనున్నట్లు ఈ సందర్భంగా వెల్లడించారు.

గూడెంగుట్ట ఆలయం తెలంగాణలో ప్రముఖ ఆధ్యాత్మిక కేంద్రంగా గుర్తింపు పొందిందని భట్టి విక్రమార్క పేర్కొన్నారు. భక్తులకు మరింత మెరుగైన సౌకర్యాలు కల్పించడంతో పాటు ఆలయ పరిసరాలను ఆధునిక హంగులతో అభివృద్ధి చేయనున్నట్లు తెలిపారు. ఈ పనులు పూర్తయితే భక్తులకు మరింత సౌకర్యవంతమైన వాతావరణం అందుబాటులోకి వస్తుందని చెప్పారు. ప్రజల విశ్వాసాలను గౌరవించడం తమ ప్రభుత్వ ప్రధాన బాధ్యతల్లో ఒకటని ఉప ముఖ్యమంత్రి పేర్కొన్నారు. ఆధ్యాత్మిక రంగంతో పాటు సంక్షేమం, విద్య, వైద్యం, వ్యవసాయ రంగాల సమగ్ర అభివృద్ధే కాంగ్రెస్ ప్రభుత్వ లక్ష్యమని స్పష్టం చేశారు. అన్ని రంగాల్లో సమతుల అభివృద్ధికి ప్రభుత్వం కట్టుబడి ఉందన్నారు. రాష్ట్రవ్యాప్తంగా దేవాలయాల అభివృద్ధికి ఇప్పటికే రూ.2,216 కోట్ల నిధులను కేటాయించినట్లు భట్టి విక్రమార్క తెలిపారు. పుణ్యక్షేత్రాల అభివృద్ధి ద్వారా ఆధ్యాత్మిక పర్యాటకానికి ప్రోత్సాహం లభిస్తుందని పేర్కొన్నారు. భక్తులకు మెరుగైన వసతులు కల్పించేందుకు ప్రత్యేక చర్యలు తీసుకుంటున్నామని చెప్పారు.
రాబోయే గోదావరి పుష్కరాలను దృష్టిలో ఉంచుకుని రూ.1,000 కోట్ల నిధులను మంజూరు చేసినట్లు వెల్లడించారు. అలాగే బాసర నుంచి భద్రాచలం వరకు ఆధ్యాత్మిక కారిడార్ అభివృద్ధికి రూ.802 కోట్లను కేటాయించినట్లు తెలిపారు. ఈ ప్రాజెక్టులు తెలంగాణ ఆధ్యాత్మిక పర్యాటక రంగానికి కొత్త ఊపునిస్తాయని అన్నారు. ఈ కార్యక్రమంలో మంత్రులు దుద్దిళ్ల శ్రీధర్ బాబు, పొన్నం ప్రభాకర్, అడ్లూరి లక్ష్మణ్ కుమార్, ఎంపీ గడ్డం వంశీకృష్ణ, ఎమ్మెల్యేలు ప్రేమ్ సాగర్ రావు, రాజ్ ఠాకూర్, గండ్ర సత్యనారాయణతో పాటు పలువురు ప్రజాప్రతినిధులు పాల్గొన్నారు. గూడెంగుట్ట ఆలయ అభివృద్ధి ప్రాంతీయాభివృద్ధికి కూడా దోహదపడుతుందని వారు అభిప్రాయపడ్డారు.