ఎయిరిండియా విమానానికి తప్పిన ప్రమాదం.

📰 Generate e-Paper Clip

• ఎయిరిండియా విమానానికి తప్పిన ప్రమాదం.
• ల్యాండింగ్ సమయంలో రన్‌వేను తాకిన విమానం తోక.
• అప్రమత్తమైన పైలట్లతో సురక్షితంగా ప్రయాణికులు.
• ఘటనపై దర్యాప్తు ప్రారంభించిన అధికారులు.
• జనం వాయిస్, బెంగళూరు, మే 21:

ఢిల్లీ నుంచి బెంగళూరుకు వచ్చిన ఎయిరిండియా విమానానికి ల్యాండింగ్ సమయంలో తృటిలో ప్రమాదం తప్పింది. రన్‌వేపై దిగుతున్న సమయంలో విమానం వెనుక భాగం నేలను బలంగా తాకిన ఘటన కలకలం రేపింది. అయితే పైలట్లు అప్రమత్తంగా స్పందించడంతో పెద్ద ప్రమాదం తప్పింది. సమాచారం ప్రకారం ఢిల్లీ నుంచి బెంగళూరుకు నూట డెబ్బై తొమ్మిది మంది ప్రయాణికులతో వచ్చిన విమానం ల్యాండింగ్‌కు సిద్ధమైంది. అదే సమయంలో రన్‌వేపై నుంచి మరో పెద్ద విమానం టేకాఫ్ కావడంతో గాల్లో గాలి అలల తీవ్ర ప్రభావం ఏర్పడినట్లు తెలుస్తోంది. ఆ ప్రభావంతో విమానం సమతుల్యత కొంత దెబ్బతినడంతో పైలట్లు ల్యాండింగ్‌ను నిలిపివేసి మళ్లీ విమానాన్ని పైకి లేపేందుకు ప్రయత్నించినట్లు సమాచారం. ఈ సమయంలో విమానం వెనుక భాగం రన్‌వేను తాకినట్లు అధికారులు గుర్తించారు. ఘటన అనంతరం విమానాన్ని పూర్తిస్థాయి తనిఖీల కోసం విమానాశ్రయంలోనే నిలిపివేశారు. దీనివల్ల బెంగళూరు నుంచి ఢిల్లీకి వెళ్లాల్సిన తిరుగు ప్రయాణ విమానాన్ని రద్దు చేసినట్లు సంస్థ వెల్లడించింది. ప్రయాణికులకు ప్రత్యామ్నాయ ఏర్పాట్లు చేపట్టినట్లు తెలిపింది. ఈ ఘటనపై విమానయాన నియంత్రణ అధికారులు దర్యాప్తు ప్రారంభించారు. నిబంధనల ప్రకారం విచారణ పూర్తయ్యే వరకు సంబంధిత పైలట్లను తాత్కాలికంగా విధుల నుంచి తప్పించినట్లు సమాచారం. ఘటనపై సమగ్ర విచారణ కొనసాగుతోందని అధికారులు తెలిపారు. ప్రయాణికుల భద్రతకు ఎలాంటి ముప్పు వాటిల్లకుండా అన్ని జాగ్రత్తలు తీసుకున్నట్లు వెల్లడించారు.